हिरोशिमा नागाशाकी पै अमेरिका नै बम्ब गिराया रै।।
सारी दुनिया दहल उठी धरती का दिल कंपाया रै।।
हिरोशिमा शहर तबाह होग्या लाखों लोग मारे गये
सबक सिखावां जापान तनै अमरीकी लगा नारे गये
आज बी भुगतै हिरोशिमा यो परमाणु बम छाया रै।।
सारी दुनिया दहल उठी धरती का दिल कंपाया रै।।
परमाणु कणों नै मार करी विकलांगता उड़ै छाई
कई बरसों जापान के महां या मची घणी तबाही
अमेरिका का जुल्मी चेहरा सबके साहमी आया रै ।।
सारी दुनिया थी दहल उठी धरती का दिल कंपाया रै।।
3
तीन दिन पाछै नागाशाकी मैं दूसरा बम्ब गिरा दिया
अपनी कड़ थेपड़ी अमरीका नै जापान माट्टी मैं मिला दिया
मानवता खड़ी लखाई थी राक्षस नै खेल रचाया रै।।
सारी दुनिया दहल उठी धरती का दिल कंपाया रै।।
4
प्रयोगशाला जापान बनाया परमाणु हथियारां की
आगे ताहीं का राह बांधया लाइन लगी ताबेदारां की
आधी तैं फालतू दुनिया नै अटम बम्ब बिसराया रै ।।
सारी दुनिया दहल उठी धरती का दिल कंपाया रै।।
5
परमाणु कण घणा भुंडा इसका सारे विरोध कराँ
मत खेलो इसकी गेल्याँ मिलके नै अनुरोध कराँ
जापान मैं अमेरिका नै कहर घणा कसूता ढाया रै।।
सारी दुनिया दहल उठी धरती का दिल कंपाया रै।।
6
यकीन और विश्वास मेरा एक दिन दुनिया जागैगी
मानवता के साहमी या इसकी दादागिरी भागैगी
रणबीर बरोने आला ये टोह टोह कै छंद ल्याया
रै ।।
सारी दुनिया दहल उठी धरती का दिल कंपाया रै।।